ಸಾಹಿತ್ಯ ಕ್ಷೇತ್ರದ ಮಿನುಗು ನಕ್ಷತ್ರದಂತಿದ್ದ, ಸರಳ ಸಜ್ಜನಿಕೆಯ, ಸಹಕಾರ ಮೂರ್ತಿ, ಸಮಾನತೆಯ ಹರಿಕಾರ, ಪ್ರಭುದ್ಧ ಭಾರತದ ಆಕಾಂಕ್ಷಿ, ಕನ್ನಡ ನಾಡು ನುಡಿಯ ಆರಾಧಕ, ಹಿರಿಯರನ್ನು ಗೌರವಿಸುವ, ಕಿರಿಯರನ್ನು ಹುರಿದುಂಬಿಸುವ, ಸದಾಕ್ರೀಯಾಶೀಲ, ಅಧ್ಯತ್ಮಿಕವೊಲವುಳ್ಳ, ಪದವಿಗಳ ಸರಮಾಲೆಯನ್ನೆ ಹೊಂದಿರುವ, ಅಹಿಂಸೆ, ಮಾನವಿಯತೆಯ ಪ್ರತಿಪಾದಕ, ಪತ್ರಕರ್ತ, ಕವಿ, ಕಾದಂಬರಿಗಾರ, ಸಾಹಿತಿ, ಮೇಲ್ವಿಚಾರ, ಮೃಧು ಸ್ವಭಾವದ ನಮ್ಮೆಲ್ಲರ ನೆಚ್ಚಿನ ರುಕ್ಮೋದ್ದಿನ್ ಇಸ್ಲಾಂಪೂರ ಇನ್ನಿಲ್ಲ.
ಬಾಲ್ಯದಿಂದಲು ಶಿಕ್ಷಣ ಮತ್ತು ಸಾಹಿತ್ಯ ಕ್ಷೇತ್ರದಲ್ಲಿ ಅಭಿರುಚಿವುಳ್ಳ ರುಕ್ಮೋದ್ದಿನರಿಗೆ ಬಡತನ ಅಡ್ಡ ಬರಲಿಲ್ಲ. ಧೃಢ ಸಂಕಲ್ಪವನ್ನು ಹೊಂದಿರುವ ರುಕ್ಮೋದ್ದಿನರು, ಎಂ.ಎ ಕನ್ನಡ, ಎಂ.ಎ ಇತಿಹಾಸ, ಎಂ.ಎ ಪತ್ರಿಕೋದ್ಯಮ, ಬಿ.ಎಲ್.ಆಯ್,ಎಸ್ಸಿ, ಎಲ್.ಎಲ್.ಬಿ, ಡಿಪ್ಲೋಮಾ ಇನ್ ಜರ್ನಲಿಜಮ್, ಪಿಜಿ ಡಿಪ್ಲೋಮಾ ಇನ್ ಹ್ಯೂಮನ್ ರಿಸೋರ್ಸಸ್ ಮಾನ್ಯೇಜಮೆಂಟ್, ಪಿಜಿ ಡಿಪ್ಲೋಮಾ ಇನ್ ಮಾಸ್ ಕಮ್ಯೂನಿಕೇಶನ್ ಆಂಡ ಜರ್ನಲಿಜಮ್ ಪದವಿಗಳನ್ನು ಪಡೆದು ಬಡತನವು ಶಿಕ್ಷಣ ಪಡೆದಯಲು ಅಡ್ಡಿ ಬರುವುದಿಲ್ಲವೆಂದು ಸಾಬೀತು ಪಡಿಸಿದವರು.
ಸದ್ಯ ಕೆ.ಎಸ್.ಆರ್.ಟಿ.ಸಿಯಲ್ಲಿ ಮೇಲ್ವಿಚಾರಕರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದ ರುಕ್ಮೋದ್ದಿನ್ ಇಸ್ಲಾಂಪೂರ್ ರವರು ಸದಾ ಸಫಾರಿ ಉಡುಪು ಧರಿಸಿಕೊಂಡು ಸಾಹಿತ್ಯದ ಯಾವುದೇ ಕಾರ್ಯಕ್ರಮವಿದ್ದರು ದಾಖಲಾತಿಗಳು ಮತ್ತು ಪುಸ್ತಕಗಳನ್ನು ಹೊಂದಿರುವ ಒಂದು ಬ್ಯಾಗ ತನ್ನ ಕೈಯಲ್ಲಿ ಹಿಡಿದುಕೊಂಡು ತಪ್ಪದೇ ಹಾಜರಾಗಿ ಭಾಗವಹಿಸಿ, ಉಪನ್ಯಾಸಕರಿಂದ ಬೋಧಿಸಲ್ಪಡುವ ಮಾರ್ಗದರ್ಶನಗಳನ್ನು ಬಹಳ ಶಾಂತತೆಯಿಂದ ಆಲಿಸುತ್ತಿದ್ದರು. ಕವಿ, ಕಾದಂಬರಿಕಾರ, ಬರಗಾರರಾಗಿ ಅನೇಕ ಸಾಹಿತ್ಯ ಕೃಷಿಗೈದಿರುವ ಇವರು ಬೀದರ ಜಿಲ್ಲೆಯ ಪ್ರತಿಯೊಬ್ಬ ಸಾಹಿತ್ಯಭಿಮಾನಿಗೆ ಚಿರಪರಿಚಿಸ್ಥರು.
ಎರಡು ದಶಮಾನಗಳ ಹಿಂದೆ ನಾನು ಸಾಹಿತ್ಯ ಕ್ಷೇತ್ರದಲ್ಲಿ ಕೃಷಿಗೈಯುವಾಗ ನನ್ನ ಕೃತಿಗಳನ್ನು ಓದಿದ ಸಾಹಿತ್ಯಭಿಮಾನಿಗಳು ಸರ್ ನಿಮ್ಮ ಸಾಹಿತ್ಯ ಗಡಸುತನದಿಂದ ಕೂಡಿದೆ ಎಂದು ಮೆಚ್ಚುಗೆಯ ಮಾತುಗಳನ್ನು ಹೇಳಿದ ನಂತರ ಮಾತು ಮುಂದುವರೆಸಿ ರುಕ್ಮೋದ್ದಿನ ಇಸ್ಲಾಂಪೂರ ರವರ ಪರಿಚಯ ನಿಮಗೆ ಇದೆಯೇ ? ಅಂತ ಕೇಳುತ್ತಿದ್ದರು, ರುಕ್ಮೋದ್ದಿನರು ಅಷ್ಟೊಂದು ಚಿರಪರಿಚಿಸ್ಥರು. ಪ್ರತಿ ವರ್ಷ 25ನೇ ಜನವರಿ ಮತ್ತು 14ನೇ ಅಗಷ್ಟದಂದು ರಾತ್ರಿ ವೇಳೆಯಲ್ಲಿ ಲಾಲಧರಿಯಲ್ಲಿ ತಪ್ಪದೇ ಸಾಹಿತ್ಯದ ಕಾರ್ಯಕ್ರಮಗಳನ್ನು ಹಮ್ಮಿಕೊಂಡು ಆ ಕಾರ್ಯಕ್ರಮಗಳಿಗೆ ನಮಗೂ ಸಹ ಅಹ್ವಾನಿಸಿ, ನನಗೆ ಸ್ವಲ್ಪ ಕೆಲಸವಿದೆ, ದಯವಿಟ್ಟು ಕ್ಷಮಿಸಿ ಅಂತ ಹೇಳಿದರೆ, ಇಲ್ಲ ಸರ್ ನೀವು ಬರಲೇ ಬೇಕು. ನೀವೇ ಬಂದು ನಿರೂಪಣೆ ಮಾಡಬೇಕೆಂದು ಹಠ ಹಿಡಿಯುತ್ತಿದ್ದರು. ಅವರ ಕೋರಿಕೆಗೆ ಮನ್ನಿಸಿ ಆಯ್ತು ಸರ್ ಎಂದು ಹೇಳಿ ಎಷ್ಟೆ ಕೆಲಸದ ಒತ್ತಡವಿದ್ದರು ಕಾರ್ಯಕ್ರಮದಲ್ಲಿ ಭಾಗವಹಿಸುತ್ತಿದ್ದೇನು. ಕಾರ್ಯಕ್ರಮದ ರೂಪರೇಶೆಗಳನ್ನು ನನ್ನೊಂದಿಗೆ ಚರ್ಚಿಸುತ್ತಿದ್ದರು. ಕೆಲವೊಂದು ಸಲಹೆಗಳನ್ನು ಕೇಳಿ ಬದಲಾಯಿಸುತ್ತಿದ್ದರು. ಕೆಲವೊಂದು ಬದಲಾವಣೆ ಮಾಡದೇ ಹಾಗೆಯೇ ಇರಲಿ ಅನ್ನುತ್ತಿದ್ದರು. ಸಮಯ ಸಿಕ್ಕಾಗ ನನ್ನ ಕಛೇರಿಗೆ ಬಂದು ಕಶಲೋಪರಿ ವಿಚಾರಿಸುತ್ತ ನಿಮ್ಮ ಕೃತಿಗಳೇಷ್ಟಾದವು ಸರ್, ಈಗ ಯಾವ ಕೃತಿ ರಚಿಸುತ್ತಿದ್ದೀರಿ ಇತ್ಯಾದಿಯಾಗಿ ಕೇಳುತ್ತಿದ್ದರು.
ರುಕ್ಮೋದ್ದಿನ್ ಇಸ್ಲಾಂಪೂರ ರಚಿಸಿರುವ ಲಾಲಧರಿ ವಿಚಾರಧಾರೆ ಪುಸ್ತಕದಲ್ಲಿ ತೈಯ್ಯಬ್, ಮೆಹಬೂಬ್, ಜಾನಿಮಿಯಾ, ಜೈನುಲ್ಲಾ ಮತ್ತು ನನ್ನನ್ನು ಆಪತ್ಕಾಲದ ಆಪದ್ಭಾಂಧವರಾಗಿದ್ದಾರೆಂದು ನಮೂದಿಸಿ ನಮ್ಮೊಂದಿಗಿದ್ದ ಸಂಬಂಧಕ್ಕೆ ಗೌರವ ಸಲ್ಲಿಸಿದ್ದರು. ಲಾಲಧರಿ ಮುತ್ಯ ರವರನ್ನು ಬಹಳ ಗೌರವದಿಂದ ಕಾಣುತ್ತಿದ್ದರು. ಲಾಧರಿ ಮುತ್ಯರವರಿಂದ ತನಗೆ ಆಧ್ಯತ್ಮಿಕವೊಲವು ಮತ್ತು ಮನಸ್ಸಿಗೆ ನೆಮ್ಮದಿ ಮತ್ತು ಶಾಂತಿ ಲಭಿಸಿದೆ ಎಂದು ಬಹಿರಂಗವಾಗಿಯೇ ಹೇಳಿಕೊಳ್ಳುತ್ತಿದ್ದರು.
ಸಾಹಿತ್ಯ ಕೃತಿಗಳನ್ನು ನೋಡುವುದಾದರೆ, “ಕಾರ್ಗತ್ತಲಿಂದ ಮಂಜು ಬೆಳಕಿನಡೆಗೆ” ಕಥಾ ಸಂಕಲನವು ವಿವಾದಕ್ಕೆ ಕಾರಣವಾಗಿತ್ತು. “ಎನ್ನೊಡಲಿಂದ ತಮ್ಮೊಡಲಿಗೆ” ಕವನ ಸಂಕಲನ, “ಕಣ್ಮಂಚಿನ ನೀರು”, “ಸಮತಿ”, “ಕರುಳ ಬಳ್ಳಿ”, “ಭಗವತಿ” ನಾಲ್ಕು ಕಾದಂಬರಿಗಳು, “ಲಾಲಧರಿ ವಿಚಾರಧಾರೆ” ವೈಚಾರಿ ಕೃತಿ, “ಶೋಧ ಭೋದ” ಮತ್ತು “ಮಾನಸ ಗಂಗೋತ್ರಿಯ ಮಡಿಲಲ್ಲಿ” ಲೇಖನ ಸಂಕಲನಗಳು. “ಈ ಯೋಗಿ ವಾಸ್ತವವಾದಿ” ಜೀವನ ಚರಿತ್ರೆ ಹೀಗೆ ಒಟ್ಟು 10 ಕೃತಿಗಳನ್ನು ರಚಿಸಿದ್ದಾರೆ.
ರುಕ್ಮೋದ್ದಿನ ಇಸ್ಲಾಂಪೂರ ರವರ ತಾಯಿ ಮಸ್ತಾನ ಬೀ ಇಸ್ಲಾಂಪೂರ ಗ್ರಾಮದಲ್ಲಿದ್ದು, ಪತ್ನಿ ಸುಹೀಲಾ ಬೇಗಂ ಖಾಸಗಿ ಶಾಲೆಯಲ್ಲಿ ಶಿಕ್ಷಕಿಯಾಗಿ ಕಲಬುರಗಿಯಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದು, ಮಗಳು ರೋಶನ್ ಇವಳು ಟ್ರೇನ್ ಟೆಕ್ನಾಲಜಿಸ್ ಕಂಪನಿಯಲ್ಲಿ ಸಾಫ್ಟವೇರ್ ಇಂಜಿನಿಯರ್ ಆಗಿ ಕೆಲಸ ಮಾಡುತ್ತಿದ್ದು, ನೂರ ಈತನು ಮೈಸೂರಿನ ಜೆ.ಎಸ್.ಎಸ್ ತಾಂತ್ರಿಕೆ ಮಹಾವಿದ್ಯಾಲಯದಲ್ಲಿ ಬಿ.ಇ ಸಿವಿಲ್ ಓದುತ್ತಿದ್ದಾನೆ. ತಮ್ಮನಾದ ಖಾಸಿಮನು ಬಳ್ಳಾರಿಯ ತೋರಣಗಲ್ಲುವಿನ ಜಿಂದಾಲ್ ಸ್ಟೀಲ್ ಇಂಡಸ್ಟ್ರೀಯಲ್ಲಿ ಎ.ಜಿ.ಎಮ್ ಹುದ್ದೆಯಲ್ಲಿದ್ದಾರೆ. ಕುಟುಂಬದವರಷ್ಟೆ ಅಲ್ಲ ಬೀದರ ಜಿಲ್ಲೆಯ ಎಲ್ಲ ಸಾಹಿತಿಗಳು ಮತ್ತು ಸಾಹಿತ್ಯಾಭಿಮಾನಿಗಳು ದುಃಖದಲ್ಲಿದ್ದಾರೆ. ಆ ಪರಮಪೂಜ್ಯನು ಎಲ್ಲರಿಗೂ ದುಃಖ ಭರೀಸುವ ಶಕ್ತಿ ನೀಡಲೆಂದು, ಅಲ್ಲಾಹನು ರುಕ್ಮೊದ್ದಿನ್ ಇಸ್ಲಾಂಪೂರಗೆ ಮಗಫಿರತ್ ನೀಡಲೆಂದು ಪ್ರಾರ್ಥಿಸುತ್ತೇನೆ.
-ಶಕೀಲ್ ಐ.ಎಸ್. ಹುಮನಾಬಾದ.