ಅಹಮದಾಬಾದ್: ಕ್ರಿಕೆಟ್ ಲೋಕದ ಅತ್ಯಂತ ರೋಮಾಂಚಕ ಹಬ್ಬ ಟಾಟಾ ಐಪಿಎಲ್ 2026ರ ಮಹಾ ಫೈನಲ್ ಪಂದ್ಯಕ್ಕೆ ಅಹಮದಾಬಾದ್ನ ನರೇಂದ್ರ ಮೋದಿ ಸ್ಟೇಡಿಯಂ ಸಜ್ಜಾಗಿದೆ. ಈ ಹೈ-ವೋಲ್ಟೇಜ್ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ಸ್ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ಹಾಗೂ ಗುಜರಾತ್ ಟೈಟನ್ಸ್ (GT) ಮುಖಾಮುಖಿಯಾಗುತ್ತಿವೆ.
ಕ್ವಾಲಿಫೈಯರ್ 1 ಪಂದ್ಯದಲ್ಲಿ ಗುಜರಾತ್ ತಂಡವನ್ನು 92 ರನ್ಗಳ ಬೃಹತ್ ಅಂತರದಿಂದ ಧೂಳೀಪಟ ಮಾಡಿರುವ ರಜತ್ ಪಾಟೀದಾರ್ ನೇತೃತ್ವದ ಆರ್ಸಿಬಿ, ಫೈನಲ್ನಲ್ಲೂ ಅದೇ ಪ್ರದರ್ಶನವನ್ನು ಪುನರಾವರ್ತಿಸುವ ತವಕದಲ್ಲಿದೆ. ಒಂದು ವೇಳೆ ಇಂದು ಗುಜರಾತ್ ವಿರುದ್ಧ ಬೆಂಗಳೂರು ಗೆಲುವು ಸಾಧಿಸಿದರೆ, ಅದು ಕೇವಲ ಟ್ರೋಫಿ ಗೆದ್ದಂತಾಗುವುದಿಲ್ಲ, ಬದಲಿಗೆ ಐಪಿಎಲ್ ಇತಿಹಾಸದಲ್ಲೇ ಸುವರ್ಣ ಅಕ್ಷರಗಳಲ್ಲಿ ಬರೆದಿಡುವಂತಹ ಹೊಸ ಇತಿಹಾಸ ಸೃಷ್ಟಿಯಾಗಲಿದೆ!
ಬ್ಯಾಕ್ ಟು ಬ್ಯಾಕ್’ ಚಾಂಪಿಯನ್ಸ್: ಇತಿಹಾಸ ಬರೆಯಲಿರುವ ಆರ್ಸಿಬಿ!
ಕಳೆದ 2025ರ ಸೀಸನ್ನಲ್ಲಿ ಪಂಜಾಬ್ ಕಿಂಗ್ಸ್ ತಂಡವನ್ನು ಸೋಲಿಸಿ ತನ್ನ ಚೊಚ್ಚಲ ಐಪಿಎಲ್ ಮುಕುಟ ಮುಡಿಗೇರಿಸಿಕೊಂಡಿದ್ದ ಆರ್ಸಿಬಿ, ಈ ಬಾರಿ ಪ್ರಶಸ್ತಿ ಉಳಿಸಿಕೊಳ್ಳುವ (Title Defence) ಮಹತ್ವದ ಹಾದಿಯಲ್ಲಿದೆ. ಇಂದು ಗೆದ್ದರೆ ಆರ್ಸಿಬಿ ಸತತ ಎರಡನೇ ಬಾರಿ (Back to Back) ಐಪಿಎಲ್ ಟ್ರೋಫಿ ಗೆದ್ದ ಅಪರೂಪದ ಸಾಧನೆ ಮಾಡಲಿದೆ. ಐಪಿಎಲ್ ಇತಿಹಾಸದಲ್ಲಿ ಈವರೆಗೆ ಕೇವಲ ಚೆನ್ನೈ ಸೂಪರ್ ಕಿಂಗ್ಸ್ (CSK) ಮತ್ತು ಮುಂಬೈ ಇಂಡಿಯನ್ಸ್ (MI) ಮಾತ್ರ ಸತತ ಎರಡು ವರ್ಷ ಟ್ರೋಫಿ ಗೆದ್ದ ಇತಿಹಾಸ ಹೊಂದಿವೆ. ಈಗ ಆರ್ಸಿಬಿ ಆ ದಿಗ್ಗಜರ ಸಾಲಿಗೆ ಸೇರಲಿದೆ.
ನಾಯಕನಾಗಿ ರಜತ್ ಪಾಟೀದಾರ್ ಹೊಸ ಮೈಲಿಗಲ್ಲು
ಫಾಫ್ ಡು ಪ್ಲೆಸಿಸ್ ನಂತರ ಆರ್ಸಿಬಿ ತಂಡದ ನಾಯಕತ್ವ ವಹಿಸಿಕೊಂಡ ರಜತ್ ಪಾಟೀದಾರ್, ಬ್ಯಾಟಿಂಗ್ ಹಾಗೂ ಕ್ಯಾಪ್ಟೆನ್ಸಿ ಎರಡರಲ್ಲೂ ಅದ್ಭುತ ಯಶಸ್ಸು ಕಂಡಿದ್ದಾರೆ. ಕ್ವಾಲಿಫೈಯರ್ 1 ಪಂದ್ಯದಲ್ಲೇ ಕೇವಲ 33 ಎಸೆತಗಳಲ್ಲಿ ಅಜೇಯ 93 ರನ್ ಚಚ್ಚಿ ತಂಡವನ್ನು ಫೈನಲ್ಗೆ ಮುನ್ನಡೆಸಿರುವ ಪಾಟೀದಾರ್, ಇಂದು ಗೆದ್ದರೆ ನಾಯಕನಾದ ಮೊದಲ ಎರಡು ಸೀಸನ್ಗಳಲ್ಲೇ ಸತತವಾಗಿ ಫೈನಲ್ ತಲುಪಿ ಟ್ರೋಫಿ ಗೆದ್ದ ಅತ್ಯಂತ ಯಶಸ್ವಿ ಯುವ ನಾಯಕ ಎನಿಸಿಕೊಳ್ಳಲಿದ್ದಾರೆ.
ವಿರಾಟ್ ಕೊಹ್ಲಿ ಕಿರೀಟಕ್ಕೆ ಮತ್ತೊಂದು ಗರಿ
ಆರ್ಸಿಬಿ ತಂಡದ ಜೀವಾಳ, ಕಿಂಗ್ ವಿರಾಟ್ ಕೊಹ್ಲಿ ಅವರ 18 ವರ್ಷಗಳ ಐಪಿಎಲ್ ಪ್ರಯಾಣದಲ್ಲಿ ಇದು ಅತ್ಯಂತ ಸುಂದರ ಕ್ಷಣವಾಗಲಿದೆ. ಮೊದಲ 17 ಸೀಸನ್ಗಳಲ್ಲಿ ಕಪ್ ಗೆಲ್ಲದಿದ್ದರೂ ನಿರಂತರವಾಗಿ ತಂಡದಲ್ಲೇ ಉಳಿದು ನಿಷ್ಠೆ ಮೆರೆದಿದ್ದ ಕೊಹ್ಲಿ, ಈಗ ಸತತ ಎರಡನೇ ಐಪಿಎಲ್ ಟ್ರೋಫಿ ಎತ್ತಿ ಹಿಡಿಯುವ ಸುವರ್ಣ ಅವಕಾಶ ಪಡೆದಿದ್ದಾರೆ. ಕೊಹ್ಲಿ ಅಭಿಮಾನಿಗಳಿಗೆ ಇದಕ್ಕಿಂತ ದೊಡ್ಡ ಹಬ್ಬ ಮತ್ತೊಂದಿಲ್ಲ.
ಗುಜರಾತ್ ತವರಿನಲ್ಲೇ ಸೇಡು ತೀರಿಸಿಕೊಳ್ಳುವ ಅವಕಾಶ
ಕಳೆದ ಕೆಲವು ಸೀಸನ್ಗಳಲ್ಲಿ ಗುಜರಾತ್ ಟೈಟನ್ಸ್ ತಂಡವು ಆರ್ಸಿಬಿಗೆ ಹಲವು ಬಾರಿ ಲೀಗ್ ಹಂತಗಳಲ್ಲಿ ಶಾಕ್ ನೀಡಿತ್ತು. ಆದರೆ ಈ ಬಾರಿ ಕ್ವಾಲಿಫೈಯರ್ 1ರ ಭರ್ಜರಿ ಗೆಲುವಿನ ನಂತರ, ಗುಜರಾತ್ ತಂಡದ ಸ್ವಂತ ತವರಾದ ಅಹಮದಾಬಾದ್ನಲ್ಲೇ ಲಕ್ಷಾಂತರ ಅಭಿಮಾನಿಗಳ ಸಮ್ಮುಖದಲ್ಲಿ ಅವರನ್ನು ಸೋಲಿಸಿದರೆ ಆರ್ಸಿಬಿ ಪಾಲಿಗೆ ಇದು ಐತಿಹಾಸಿಕ ಸೇಡಿನ ಗೆಲುವಾಗಲಿದೆ.
ಇಡೀ ದೇಶಾದ್ಯಂತ ಈಗ ಒಂದೇ ಘೋಷಣೆ ಮೊಳಗುತ್ತಿದೆ — “ಈ ಸಲವೂ ಕಪ್ ನಮ್ಮದೇ!” ರಜತ್ ಪಾಟೀದಾರ್ ಅವರ ಸ್ಫೋಟಕ ಬ್ಯಾಟಿಂಗ್, ವಿರಾಟ್ ಕೊಹ್ಲಿ ಹಾಗೂ ದೇವದತ್ ಪಡಿಕ್ಕಲ್ ಅವರ ಭದ್ರ ಬುನಾದಿ, ಮತ್ತು ಭುವನೇಶ್ವರ್ ಕುಮಾರ್ ನೇತೃತ್ವದ ಮಾರಕ ಬೌಲಿಂಗ್ ದಾಳಿಯ ಬಲ ಹೊಂದಿರುವ ಆರ್ಸಿಬಿ ಇತಿಹಾಸ ಬರೆಯುವುದನ್ನು ತಡೆಯಲು ಯಾರಿಂದಲೂ ಸಾಧ್ಯವಿಲ್ಲ ಎನ್ನುವುದು ಅಭಿಮಾನಿಗಳ ಗಟ್ಟಿ ನಂಬಿಕೆ.
ವರದಿ : ನಾಗರಾಜ್ (ಕೆ.ಕಲ್ಲಹಳ್ಳಿ)