ಉನ್ನತ ವ್ಯಾಸಂಗಕ್ಕಾಗಿ ವಿದೇಶಕ್ಕೆ ತೆರಳಿದ ಬಡ ಯುವಕನೊಬ್ಬನ ಬದುಕು ಅನಿರೀಕ್ಷಿತ ತಿರುವು ಪಡೆದುಕೊಂಡು, ಈಗ ಆತ ಐಷಾರಾಮಿ ಜೀವನ ನಡೆಸುತ್ತಿರುವ ರೋಚಕ ಸಂಗತಿಯೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದೆ.
ಎಂಬಿಬಿಎಸ್ ಓದಲು ತೆರಳಿ ಪ್ರೊಫೆಸರ್ ಜೊತೆ ಪ್ರೇಮಾಂಕುರ….
ಉತ್ತರ ಪ್ರದೇಶದ ಲಖನೌ ಮೂಲದ ಬಡ ಕುಟುಂಬದ ಯುವಕನೊಬ್ಬ ಎಂಬಿಬಿಎಸ್ (MBBS) ವ್ಯಾಸಂಗಕ್ಕಾಗಿ ಎರಡು ವರ್ಷಗಳ ಹಿಂದೆ ರಷ್ಯಾಕ್ಕೆ ತೆರಳಿದ್ದನು. ಮೊದಲ ವರ್ಷದಲ್ಲಿ ಪರಿಚಯಸ್ಥರು ಯಾರೂ ಇಲ್ಲದೆ, ಹೊಸ ವಾತಾವರಣದಲ್ಲಿ ಆತ ಸಾಕಷ್ಟು ಒಂಟಿತನ ಮತ್ತು ಬೇಸರ ಅನುಭವಿಸುತ್ತಿದ್ದನು. ಅದೇ ಸಮಯದಲ್ಲಿ ಕಾಲೇಜಿನಲ್ಲಿ ಬೋಧನೆ ಮಾಡುತ್ತಿದ್ದ ರಷ್ಯಾದ ವಿಚ್ಛೇದಿತ ಮಹಿಳಾ ಪ್ರೊಫೆಸರ್ ಜೊತೆ ಈತನಿಗೆ ಸ್ನೇಹ ಬೆಳೆಯಿತು.
ಪಾಠದ ಡೌಟ್ನಿಂದ ಶುರುವಾಗಿ ಮದುವೆಯಲ್ಲಿ ಅಂತ್ಯ…
ವ್ಯಾಸಂಗಕ್ಕೆ ಸಂಬಂಧಿಸಿದ ಅನುಮಾನಗಳನ್ನು (Doubts) ಬಗೆಹರಿಸಿಕೊಳ್ಳುವ ನೆಪದಲ್ಲಿ ಯುವಕ ನಿತ್ಯ ಆಕೆಯೊಂದಿಗೆ ಚರ್ಚೆ ನಡೆಸುತ್ತಿದ್ದನು. ಈ ಮಾತುಕತೆ ದಿನ ಕಳೆದಂತೆ ಇಬ್ಬರ ನಡುವೆ ಪ್ರೀತಿಗೆ ದಾರಿಯಾಯಿತು. ಪರಸ್ಪರ ಅರ್ಥಮಾಡಿಕೊಂಡ ಇಬ್ಬರೂ ಅಂತಿಮವಾಗಿ ವಿವಾಹವಾಗಲು ನಿರ್ಧರಿಸಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟರು.
ಕ್ಲಿನಿಕ್ ಆರಂಭ, ತಿಂಗಳಿಗೆ ₹2–3 ಲಕ್ಷ ಆದಾಯ…
ಮದುವೆಯ ಬಳಿಕ ಇಬ್ಬರೂ ಒಟ್ಟಾಗಿ ರಷ್ಯಾದಲ್ಲಿ ಸ್ವಂತ ಕ್ಲಿನಿಕ್ ಆರಂಭಿಸಿದ್ದು, ವೈದ್ಯಕೀಯ ವೃತ್ತಿಯಲ್ಲಿ ಯಶಸ್ಸು ಕಂಡಿದ್ದಾರೆ. ತಮ್ಮ ಕಠಿಣ ಪರಿಶ್ರಮದಿಂದ ತಿಂಗಳಿಗೆ ₹2 ರಿಂದ 3 ಲಕ್ಷ ರೂಪಾಯಿಗೂ ಹೆಚ್ಚು ಆದಾಯ ಗಳಿಸುತ್ತಾ ಐಷಾರಾಮಿ ಜೀವನ ನಡೆಸುತ್ತಿದ್ದಾರೆ.
”ಜೀವನದಲ್ಲಿ ಸೆಟಲ್ ಆಗಬೇಕೆಂದರೆ ಒಂದು ಬಿಘಾ ಜಮೀನು ಮಾರಿ ರಷ್ಯಾಕ್ಕೆ ಬಂದು ಓದಿ, ರಷ್ಯನ್ ಮಹಿಳೆಯನ್ನು ಮದುವೆಯಾಗಿ ಜೀವನ ರೂಪಿಸಿಕೊಳ್ಳಿ” ಎಂದು ಯುವಕ ತಮಾಷೆಯಾಗಿ ಹಂಚಿಕೊಂಡಿರುವ ಮಾತುಗಳು ಈಗ ನೆಟ್ಟಿಗರಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿವೆ.